Нашите објави на социјалните мрежи многу често не „соголуваат“ и откриваат многу за нас, понекогаш и многу повеќе отколку што би требало. Да, понекогаш тоа откривање е и симпатично, го покажува нашиот карактер, нашите интереси…но понекогаш (всушност доста често), може да носи и одредени опасности. Често пати се говори на пример дека кога одите на одмор, или кога подолг период нема да бидете во своите домови, не треба тоа да го објавувате на социјалните мрежи, затоа што може да се толкува како директна покана до крадците. Но, тоа е само една од многуте опасности кои се кријат, а еве уште неколку, кои се поврзани директно со објавувањето на фотографии.

Објавувањето одредени видови фотографии на социјалните медиуми не е секогаш добра идеја. Одредени фотографии може да го загрозат вашиот бизнис, вашата врска или вашите приватни информации.

Затоа, важно е да внимавате што објавувате за себе на социјалните мрежи, и еве  11 типа на фотографии што никогаш не треба да ги објавувате.

1. Билети за патување

Иако може да изгледа сосема безопасно да објавите фотографија од билет за патување на кое наското ќе одите, тоа не е баш така. Имено, хакерите на тој начин можат да добијат податоци како што се вашиот број, датум на раѓање, па дури и некои податоци од вашиот пасош. Покрај тоа, датумот на поаѓање и враќање обично е означен на картата. Благодарение на ова, провалниците знаат кога нема да бидете дома и можат да ја искористат оваа ситуација.

2. Пари

Објавувањето фотографии што покажуваат информации за платата, како и фотографирање картички, едноставно не е добра идеја.

3. Добитен лото тикет

Ако имате среќа да победите на лотарија, чувајте го за себе.

4. Службени меилови

Не треба да споделувате информации поврзани со вашиот бизнис на социјалните медиуми. Без разлика дали станува збор за нова деловна идеја што вашата компанија ја развива или станува збор за комуникација со колегите, не треба да објавувате ништо од тоа. Може да ја изгубите работата поради такви работи.

5. Извод од матичната книга на родените или државјанство

Објавувањето какви било лични документи на социјалните медиуми едноставно не е добра идеја. И иако можеби ви се чини, ако имате дете, дека е интересно да го споделите неговиот извод од матичната книга на родените  на социјалните мрежи, вие само ги загрозувате неговите податоци и идентитет. Изводот на родените е основниот документ врз основа на кој едно лице ги добива сите други документи и сигурно не сакате сите ваши следбеници да ги знаат сите податоци од него. Никогаш не знаете во чии раце може да падне и како таа личност ќе има корист од тоа.

6. Трудови кои не се авторизирани

Иако можеби сакате да се пофалите со нешто што сте напишале, не треба да го споделувате преку Интернет пред да го објавите вашето дело заштитено со авторски права. Другите така многу  лесно можат да си земат заслуга за вашата работа.

7. Фотографии од деца

Секогаш размислете двапати пред да објавите фотографии од вашите или нечии деца на социјалните мрежи. Пријавени се случаи во кои се преземале фотографии од деца и се користеле за криминални цели.

8. Спомени од пијана вечер

Проблемот веројатно нема да дојде ако имате неколку вакви фотографии, бидејќи треба да се претпостави дека сите ние излегуваме и се забавуваме од време на време, дури и вашиот потенцијален работодавец. Но, она што сигурно нема да му се допадне на работодавачот е ако профилот ви е преполн со такви фотографии.

9. Политички објави

Не треба да споделувате политички шеги и објави на вашите профили бидејќи тоа може да ве чини работа. Покрај тоа, политичките објави можат да предизвикаат доста жестоки дебати, поради што можете да се карате со пријателите.

10. Важни објави од други луѓе

Ако вашата сестра или најдобра пријателка објави дека е бремена или е свршена, не морате вие да бидете први што ќе го напишете ова на вашите социјални мрежи и ќе му соопштите на светот дека сте многу среќни за неа. Почекајте таа да биде првата што ќе одлучи да ги сподели овие информации со другите, и вашата објава оставете ја за тогаш, во спротивно ќе го украдете нејзиниот момент.

11. Фотографии на други луѓе

Објавувањето на туѓи фотографии на социјалните мрежи ги крши стандардите на Фејсбук, и во многу земји ова е законски регулирано, па објавувањето фотографии на други луѓе е нелегално. Во зависност од природата на сликата, другата личност може да ве тужи.