Љубенка Ордева е студент 5 година на Факултетот за Медицински науки при Универзитетот „Гоце Делчев“ во Штип. По повод 9 ноември, Денот на ослободувањето на градот,  во Велес секоја година се одржува настан на кој се доделуваат награди. Една од нив е и онаа за нај-студент „Проф. Д-р Ѓорѓи Шоптрајанов„, која оваа година заврши во рацете на Љубенка.

Љубенка со своето признание

Критериуми за оваа награда се:

• Просечен успех во текот на студирањето од најмалку 9,5
• Учество на тренинг курс на државно или меѓународно ниво
• Учество на државни конгреси, симпозиуми,
• Учество на државни или меѓународни проекти

Кон предлогот се доставува:

• уверение за положени испити издадено од факултет
• копија од лична карта и индекс
• копии од дипломи, награди и сертификати

Наградата е ограничена само на жителите на Велес

Како студент со 9.82 просек, Љубенка ни посочи некои совети кои и помогнале нејзе на патот кон успехот.

„Успехот го постигнав со многу труд. Секогаш се вложувам максимално за секој предмет. Истрајна сум и упорна во она што го правам и тоа е клучно за постигнување на целта. Мој совет кон помладите колеги е да веруваат во себе и да чекорат по патот кон успехот. Учењето можат да си го олеснат со тоа што секој ден ќе им биде однапред организиран и секогаш да се раководат според планот. За да го постигнам овој успех жртвував многу од моето слободно време, си го скратував спиењето и времето за одмор ама на крај секогаш вложениот труд се вреднува.“, вели Љубенка.

При совладување на обемни материи, ова се неколку од триковите кои студентката ги користи:

• При совладување на обемни материјали секогаш издвојувам повеќе време за учење. Почесто го повторувам материјалот што сум го учела претходните недели и така го стекнувам знаењето.
• Некои сегменти кои не можам да ги запаметам веднаш, ги пишувам на лист хартија и ги закачувам на видно место во мојата соба каде што секојдневно ги читам и многу полесно ги меморирам.
• Последните два дена пред испит или колоквиум секогаш ги повторувам најбитните работи од цел материјал.

Нормално како и секој студент, и таа имала потешкотии при учењето на одредени предмети кои барале многу непроспиени ноќи и стрес.

„Најтежок премет за совладување ми беше Микробиологија со Паразитологија. Материјалот беше обемен и испитот се состоеше од два дела. Практичен дел и устен испит. Потребно беше да се научат многу микроорганизми и детали за да се положи практичниот испит, а соодветно на тоа и завршниот испит. Го положив со многу учење од прв пат.“, вели Љубенка.

Како најинтересен, студентката го издвојува предметот Онкологија со радиотерапија. Механизмот за настанување канцер клетки, факторите на карциногенеза и третманот на малигни заболувања и го привлекле вниманието на Љубенка.

Во иднина таа се гледа како успешна докторка во нашата држава.