Денес, навршуваат 15 години од смртта на великанот на македонската современа книжевност, Петре М. Андреевски.

Поет, романсиер, раскажувач, драмски автор. Пишувал раскази, романи, драми и филмски сценарија, но посебна длабочина имаат неговите стихови. Сите негови дела, не само што ја променија свеста за литературата кај македонските читатели, туку ја променија и македонската критичка свест.

Неговиот роман „Пиреј“ е прогласен за ремек-дело на македонската современа проза од страна на македонската литературна критика. Стихозбирката „Дениција“, означена како химна на комсичката љубов, на жената, татковината, се издигна на пиедесталот и е класифицирана како златна книга на македонскиот модернизам.

Делата на Петре М. Андреевски се преведени на повеќе јазици, доближувајќи го до странската читателска публика како поет на метафората и алузијата, на јазичната игра и носталгичноста.

Поезијата на Петре М. Андреевски е за оние што знаат да љубат…За оние што ја доживеале и оние што ќе ја доживеат допрва.