Сатанистички педофили што го тресат светот, Бил Гејтс сака да не чипира со вакцините, 5G ќе истреби 90% од човештвото,  Сорос сака да го замени европското население со Арапи, еврејските банкари  ја предизвикаа финансиската криза… се се тоа современи и податливи теории на заговор за кои слушнал или прочитал огромен дел од населението во светот. Но пред нив, во годините наназад, се до 2001 година, имавме теорија на заговор што го отвори патот за сите нив.

https://unsplash.com/photos/A32DH4B0FBY?utm_source=unsplash&utm_medium=referral&utm_content=creditShareLink

„9/11 inside job“ – oвие два броја и два збора ги слушнавме сите ниe кои во годините по нападите врз Светскиот трговски центар (Кулите Близначки) и Пентагон на 11 септември 2001 година имавме пристап до Интернет, во тоа време се уште главно спор и ограничен и знаевме како да користиме Интернет Експлорер или Mozilla Firefox. Некои од нас кои беа доволно млади и незрели во тоа време, разни документарни филмови, видеа од раните години на YouTube со драматична музика и уште подраматични тврдења и написи на нејасни страници, не наведоа барем еднаш да се посомневаме дека во таа теорија на заговор , како што се вели: „има нешто“.

Интернетот и недовербата кон американската влада како плодна почва

Впрочем, анти-американското расположение беше во својот врв во тоа време. По сцените на нехуман третман на затворениците во Гвантанамо и Абу Граиб, после, во најмала рака, контроверзната одлука на Џорџ В. Буш да го нападне Ирак и да го собори режимот на Садам Хусеин (кој,  и покрај сите негови злосторства, немаше никаква врска со нападите од 9 /11), со масовни антивоени протести низ целиот свет, откако сепак му беше даден нов мандат на претседателските избори во 2004 година, голем дел од светот беше разочаран и згрозен од американскoтo „каубојство“.

Откритието дека Садам Хусеин нема арсенал оружје за масовно уништување, што беше главното  официјално оправдување за инвазијата, предизвика бран недоверба кон американската влада дома и во странство, и таа недоверба продолжи да се продлабочува до ден денес.

Оваа антиамериканска атмосфера, заедно со Интернетот како нов медиум за размена на мислења и дистрибуција на информации – и дезинформации, без никакви регулативи, беа плодна почва за ширење на теории на заговор. Важен фактор, се разбира, беше шокот на Американците со фактот дека најмоќниот воен и безбедносен апарат во светот не успеа да спречи таков технолошки примитивен, но крајно деструктивен терористички напад. Не е ни чудо што нејасниот документарен филм „Loose Change“, објавен на Интернет во 2005 година, брзо стана вирален.

Тој филм беше првиот што ја популаризираше теоријата на заговор дека нападите од 11 септември се всушност напади од  внатре – дека не се извршени од џихадистички терористи на Ал Каеда предводени од Осама бин Ладен, кој имаше терористичка база во Авганистан, туку дека тоа го спровела самата американска влада или таканаречената „длабока држава“, како оправдување за долготрајната војна против теророт што следеше.

Филмот и неговите продолженија, или нови изданија, претставија серија наводни докази, на прв поглед доста убедливи, дека Кулите Близначки на Светскиот трговски центар во Њујорк всушност биле урнати со експлозив поставен во нив кој наводно се гледа на снимката. Покрај тоа, удар на авион полн со гориво не може да ги сруши облакодерите, уверуваше режисерот и наратор на филмот Дилан Ејвери, бидејќи „горивото на авионот не може да ги стопи челичните греди“.

Ова очигледно погрешно тврдење – „jet fuel can’t melt steel beams “, со текот на времето стана бескрајна инспирација за потсмевачки  мемиња . Но, многу луѓе поверуваа во тоа.

Како што веќе беше случај со ваквите појави, невозможно е да се каже колку луѓе во Америка и во странство беа заведени од овој филм и други филмови, статии и видеа што следеа, но режисерот тврди дека повеќе од 100 милиони луѓе го гледале филмот.

“Истражување” на YouTube

Во секој случај, знаеме дека врз основа на оваа теорија на заговор, формирано е вистинско онлајн движење на таканаречени „truthers“ – оние кои се убедени дека американскиот естаблишмент ја крие вистинската вистина за 11 септември. И додека дел од движењето веруваше дека администрацијата на Буш го организирала самиот напад, друг дел верувал во поблага верзија на заговорот – дека Буш и неговата клика знаеле дека Ал Каеда подготвува напад, но намерно го дозволила тоа.

Во интернетскиот „кошмар“ се појави цела низа на фантастични верзии за настаните: дека кулите близначки биле соборени од експлозив во исто време кога во нив удриле празни авиони водени од далечински управувач, авиони кои всушност биле намонтирани на снимки додека Кулите Близначки биле соборени од експлозив, проектил што всушност погодил зграда во Пентагон, итн.

https://unsplash.com/photos/FQ9N8ewA5GA?utm_source=unsplash&utm_medium=referral&utm_content=creditShareLink

Дека овие луди теории на заговор сe уште се релевантни, потврдува и новата документарна серија на култниот афро-американски режисер Спајк Ли, „NYC Epicenters 9/11–2021 ½“, во која тој им отстапи простор на здружението „Architects & Engineers for 9/11 Truth“ и нивната теорија дека нападот е организиран од Вашингтон. Ли и HBO, соочени со критики за промовирање теорија на заговор, на крајот ја едитираа последната епизода од серијата пред да се емитува.

Пораката на „Loose Change“, дека луѓето можат да истражат и да ја откријат вистината за она што навистина се случи на 11 септември, служеше како модел за движењата на теоретичарите на заговор што дојдоа години подоцна – од QAnon до анти -ваксерите и оние кои тврдат дека пандемијата е всушност „пландемија“, односно дека е намерно испровоцирана од небулозни центри на моќ со цел да се постигнат нивните ѓаволски цели. И тие, исто како и „ 9/11 truthers“, ги повикуваат своите следбеници да ги игнорираат експертите и „сами да истражуваат“ на Интернет.

Иако лажните докази за „исценираниот“ напад на 11 септември се негирани безброј пати, вреди да се наведат најважните факти овде.

Официјалните извештаи за истрагите спроведени од американската Федерална агенција за управување со вонредни состојби (ФЕМА) во 2002 година и Националниот институт за стандарди и технологија во 2005 година открија дека Кулите Близначки се урнале не поради самиот удар на авионите што удрија во нив, туку поради горивото со кое биле наполнети, а кое продолжи да гори на местото на ударот.

Авионите не можеа да урнат облакодери кои беа повеќе од 1.000 пати потешки од нив и високи повеќе од 400 метри, изградени од бетон и челик (за разлика од авионите направени претежно од лесни метали како алуминиум) и дизајнирани да издржат силни налети на ветер.

https://unsplash.com/photos/e4C0gS55oOQ?utm_source=unsplash&utm_medium=referral&utm_content=creditShareLink

Челичните греди не се стопија, туку попуштија

Скептиците честопати наведуваат дека начинот на кој облакодерите ненадејно се срушиле навнатре,  во себе, околу еден час по ударот, мора да бил резултат на контролирана експлозија. Температурата на горивото што гори (до 815 степени Целзиусови) навистина не е доволна за да се стопат челичните греди (кои се топат на 1500 степени Целзиусови). Но, огнот не ги стопил челичните греди, туку ги искривил додека на крајот не попуштиле, предизвикувајќи пропаѓање на облакодерите.

“Никогаш не сум видел стопен челик во пожар во зграда. Но, сум видел многу изопачен, искривен, свиткан и лабав челик. Она што се случува е дека челикот се обидува да се прошири на двата краја, но кога не може да се прошири повеќе, тој тоне во и околните бетонски пукнатини “, изјави  за часописот Popular Mechanics пензионираниот заменик -пожарникар во Њујорк , Винсент Дан, автор на книгата„ The Collapse Of Burning Buildings: A Guide To Fireground Safety “ .

Горивото што заврши во зградите брзо изгоре, но запали материјали како што се мебел, завеси и хартија.

WTC 7 се урна затоа што самиот се запали

Друга популарна скептичка теза е дека блиската зграда на WTC број 7 не можела сама да се сруши бидејќи авион не ударил во неа. Но, се урна седум часа по Кулите Близначки бидејќи запалените остатоци од северната кула паднале врз неа и запалиле најмалку 10 ката во зградата.

„Truthers“ го наведуваат прелиминарниот извештај на FEMA дека WTC 7 претрпел релативно мала штета пред да се сруши. Но, извештајот на НИСТ, објавен три години подоцна, заклучува дека штетата била многу поголема отколку што се наведува во извештајот на ФЕМА.

„Најважното нешто што го откривме е дека всушност имало физички оштетувања на јужната страна на зградата 7. Околу една третина од предната страна кон средината и дното – околу 10 ката – имало оштетено околу 25 проценти во длабочина на зградата“, вели водечкиот истражувач на НИСТ Шјам Сандер за Popular Mechanics .

Авионот се урна во Пентагон, му се скршија крилјата, а остатоците завршија во зградата

Што се однесува до зградата на Пентагон, „truthers“ се убедени дека таа всушност била погодена од наведувана ракета , а како доказ наведуваат дека дупката во зградата на Пентагон била широка само околу 5 метри, додека распонот на крилјата на патничкиот авион Боинг 757 е околу 38 метри. Меѓутоа, тврдењето дека дупката во ѕидот на зградата била широка само 5 метри е целосно погрешно, како што објаснува порталот на телевизискиот канал  History  во својата анализа.

Всушност, дупката била широка околу 25 метри. Се уште е помала од распонот на крилјата, но има објаснување и за тоа: едното крило на киднапираниот авион се срушило кога удрило во земјата, пред да удри во самата зграда. Второто крило се откинало кога ја погодило зградата, што исто така не е ни малку невообичаено – релативно лесната конструкција на крилото не можела да издржи судир со армиран бетон на зградата.

Исто така, не е точно дека остатоците од авионот не се пронајдени на местото на падот. Алин Е. Килсхајмер, извршен директор на KCE Structural Engineers PC во Вашингтон, пронашол рекордер за снимање за црната кутија на авионот, како и делови од опашката на авионот. Тој, исто така, видел траги од удари на крилата од страната на зградата пред да се сруши голем дел од надворешниот ѕид на Пентагон. Исто така, забележал делови од тела расфрлани на местото на несреќата, како и униформи на екипажот и облека од патници.

Но, можеби најважно од се, поголем дел од авионот од Летот 77 завршиле во Пентагон, а не надвор од него.

Се разбира, сите докази во светот нема да ги убедат најзагрижените „трутери“ кои се уште тврдат дека Америка се нападнала себеси пред 20 години, и покрај десетиците напади на исламистички терористи што следеа, од Барселона до Орландо, од Лондон до Истанбул. Едноставно нема помош за нив.

Од 9/11 до „пландемијата“ и QAnon

Меѓутоа, многу поважно е дека многумина кои оваа заводлива лага ги воведе во параноичниот свет на теориите на заговор, со текот на времето, само се префрлија на други, повеќе актуелни и податливи теории на заговор. Не е воопшто чудно, како што пишува  New York Times , што продуцентот на Loose Change, Јason Bermas, сега промовира теории на заговор за пандемијата на коронавирус и слични теми на неговиот канал на YouTube.

https://unsplash.com/photos/O1-L6jkFuPY?utm_source=unsplash&utm_medium=referral&utm_content=creditShareLink

QAnon, Pizzagate, “plandemija”, “бел геноцид”- сето тоа се измислици на кои онаа за 9/11 ширум им го отвори патот. Сите тие имаат заеднички принципи: Естаблишментот ве лаже. Не им верувајте на експертите и медиумите, туку на вашето „истражување“ на YouTube и Facebook. Зад секој страшен и тешко разбирлив настан постои некоја мистериозна клика . Алтернативните извори на информации се  секогаш подобри од „мејнстрим“. Секој доказ што ја поткопува теоријата на заговор е самиот фалсификуван.

Сето ова го прави нашето општество поирационално, нефункционално и поподложно на опасни, бескрупулозни шарлатани. Сепак, решението е едноставно во принцип – да се примени исто ниво на скептицизам кон теоретичарите на заговор како и кон омразениот естаблишмент.