Системот за автоматско санкционирање на сообраќајни прекршоци „Безбеден град“ официјално ќе почне да функционира од февруари 2026 година, потврди Министерството за внатрешни работи за „360 степени“. Ова значи дека стартот е поместен за еден месец во однос на првичните најави дека ќе биде активен уште во јануари.

Министерот Панче Тошковски веќе предупреди дека е можно одложување, особено по почетокот на тест-периодот кога беше утврдено дека одредени функционалности треба дополнително да се унапредат.

Според МВР, „Безбеден град“ во првата фаза ќе биде активиран во Скопје, Тетово и Куманово, како и на делници од автопатите на коридорите 8 и 10.

Системот ќе се потпира на мрежа од фиксни камери кои ќе регистрираат прекршоци како пречекорување на брзина, минување на црвено светло и возење нерегистрирани возила. Дополнително, низ градовите ќе патролираат и специјализирани полициски возила опремени со технологии за снимање, кои ќе бележат непрописно паркирање и други нарушувања на сообраќајните правила.