Денеска во Македонија се празнува Свети Климент Охридски, наш најголем просветител и учител.

Климент Охридски бил роден во 840 година, но овој податок е претпоставка. Бил верен придружник и посветен ученик на Светите браќа Кирил и Методиј. Им помагал на своите духовни отци (учители), следејќи го секој нивни чекор, преведувајќи ги црковните книги, библиските и литургиски текстови.

Во областа Кутмицевица, за која уште не е определена точната местоположба, Климент Охридски го започнува најплодниот период во својот живот. Го продолжува делото на Св. Кирил и Методиј, ги поставува, повторно, основите на словенската писменост и проповедал и богослужел на народен јазик. Градел цркви и манастири, но најважното и најкарактеристичното за него е основањето на Охридската книжевна школа. Со основањето на оваа книжевна школа, Охрид станал главен црковен и книжевен центар на сесловенската и македонската писменост. Климент Охридски е светлата точка на едно мрачно и темно време.

Претседателот на државата Стево Пендаровски го честиташе големиот празник Свети Климент Охридски.

„ Мудроста и поуките на Свети Климент Охридски се втемелени во светогледот на нашиот народ и на нивните вредности се развива и нашата Македонска православна црква. Инспирирани од неговото дело, во овие сложени времиња исполнети со многу предизвици, да се стремиме кон подостоен живот, живот исполнет со добри дела. Нека е за многу години големиот празник Свети Климент Охридски. Да бидеме солидарни, сплотени, да си посветуваме внимание и да си даруваме љубов“ напиша тој на Фејсбук.

„Свети Климент Охридски е човек, кој со своето цивилизациско дело, кириличната азбука, се запишал со златни букви во словенскиот свет, но и во европската и светска духовна и културна ризница. Тој е еден од најголемите и најдостојните ученици на светите Кирил и Методиј кој целиот свој живот го посветил на продолжувањето и ширењето на нивната работа“, напиша претседателот на ВМРО – ДПМНЕ Христијан Мицкоски во честитката по повод државниот празник.

Премиерот Зоран Заев исто така по повод денешниот празник упати честитка до сите православни верници и до Синодот на Македонската православна црква – Охридска архиепископија.

– Свети Климент, како голем човек и силна личност, е жив паметник на нашата историја и како основач на Охридската школа, позната и како „прв балкански и европски универзитет“. Записите велат дека низ оваа школа минале околу 3.500 ученици. Тоа е импозантен број за тогашните, а секако и за денешните времиња. Тоа сведочи и за исклучителните организациски, но и обединувачки способности на светиот учител од Охрид во духот на христијанското заедништво, пишува Заев во честитката објавена на Фејбук.