Вработените во управата и правосудството во четврток и петок ќе имаат прекин на работата два часа, од 10 до 12 часот, барајќи исплата на минимална плата и линеарно зголемување на платите на сите вработени за 2.806 денари.

Ќе се протестира во сите оние институции каде Синдикатот на УПОЗ има синдикални организации како што се министерства, агенции, фондови, управи и судови.

Дека ќе има прекин на работата објави на прес конференција претседателот на Синдикатот на УПОЗ, Трпе Деаноски. Тој изјави и дека се известени се и Владата и министерства и сите работодавачи, а ги замоли граѓаните за трпение

Во 95 проценти од институциите, како што посочи Деаноски, се исплаќа плата под минималната, а во останатите пет проценти, дел не ја подготвуваат платата, а оние што веќе ја исплатиле, направиле грешки и исплатиле само минимална плата без стаж.

Прекинот на работата засега два часа, можно е и да се зголеми

Досега, од Владата не добиле покана за преговори, а притисокот од членството, како што посочија, е голем и се бара прекинот на работата да продолжи.

„Се надеваме дека Владата и надлежните ќе имаат барем малку сенс и ќе направат напори овој период да разговараме и да најдеме начини за решавање на нашите барања, но изгледа дека Владата не е заинтересирана за преговори со нас, иако тоа го вети. Она за што предупредувавме минатиот пат се оствари и скоро во сите институции во управата и правосудството на вработените не им се исплаќа минимална плата. Досега, над 95 проценти од институциите продолжуваат со исплата на плата под минимална плата. Останатите пет проценти, дел не знаат што да прават и не ја подготвуваат платата, а оние што се потрудиле да исплатат минимална плата направиле катастрофални грешки во исплатата на истата. Повторно вработените од управата и правосудството остануваат единствените во државата со плата под минамалната плата“, рече Деаноски, потсетувајќи дека засега овој прекин нааботата е неизбежен, а прашање е дали ќе биде и зголемен.

СОНК најави штрајк во училиштата и градинките на 11 април

Како за пример дека институциите не го почитуваат Законот за минимална плата, од УПОЗ го посочуваат примерот со објавениот оглас од Министерството за финансии за референт писар за кое работно место е предвидена плата од 14.909 денари што е пониска не само од важечкиот износ на минимална плата од 18.000 денари, туку и од претходниот износ на минималецот од 15.142 денари.