Практичната настава најмногу „настрадала“ како резултат на корона кризата кај студентите и средношколците по медицина. Ова го покажа истражувањето кое го спроведоа гоце.мк и УГД ФМ.

Од онлајн истражувањето кое беше поставено претходно дознавме дека повеќе од 50% од студенти и средношколци по медицина сметаат дека практичната настава е проблем на кој треба да се работи.

Студентите и средношколците имаа можност и да дадат свои коментари или да споделат лични искуства во однос на нивните најгорливи проблеми. Пренесуваме еден од многуте коментари кои се со слична тематика во однос на праксата

Ги консултиравме и студентските лидери. Годинава лидерката на Универзитетското студентско собрание на Универзитетот „Гоце Делчев“ во Штип е исто така студентка по медицина. Сара Денкова го дели ставот дека праксата е многу значајна за студентите по медицина.

Дека праксата е многу важен сегмент се согласува и претседателот на студентската организација на студентите по медицина СОМА. СОМА е организација на студенти по медицина која ги застапува интересите на сите студенти кои се на медицинските факултети низ државата. Стефан Мишовски е претседател на СОМА и студент по медицина на Универзитетот „Гоце Делчев“.

Професорката д-р Катарина Смилков од Факултетот за медицински науки при УГД вели дека има прогрес кога станува збор за праксата, но дека е потребно континуирано усовршување и подобрување на плановите и програмите.

Короната во најголем дел придонесе за недостатокот на практична настава кај најголем дел од средношколците и студентите по медицина. Овој сегмент во медицинското образование е задолжителен и според домашната и според меѓународната практика, но за време на ковид пандемијата тоа беше стопирано.

Наставата во голем дел од факултетите и средните училишта по медицина во државата се нормализира. Групите продолжуваат да одат на настава со физичко присуство и повторно се полнат амфитеатрите и болничките капацитети. Подобрувањето на наставата во медицинските образовни институции е клучна, затоа што токму ова се кадрите кои се почесто и заминуваат од државата. Според анкетата која ја спроведовме повеќе од 50% од нив веќе размислуваат да ја напуштат државата после завршувањето на нивното медицинско образование.

Студентите кои се дел од двете најголеми студентски организации велат дека и самите организации можат да придонесат за подобрување на овие состојби. СОМА веќе иницирале соработка со некои болници надвор од она што го прават факултетите, а УСС при УГД велат дека се решени овие предизвици да ги постават пред своите професори и да ги решат во заеднички разговор.

Според анкетата над 61% од анкетираните одговориле дека се запишале медицина заради тоа што тоа е она што го сакаат. Студиите по медицина моментално се најпопуларни и најбарани на речиси сите универзитети низ државата. Фактот дека голем дел од младите заминуваат да студираат медицина на добри универзитети надвор од државата е доказ дека младите бараат и имаат потреба од поквалитетно образование.