Испитната сесија е време исполнето со бесконечни часови учење, напнати денови, непроспиени ноќи и врв кој студентите треба да го освојат.

Нервозата што произлегува од очекувањата, тревогата за резултатите и притисокот да се постигнат одлични успеси, можат да предизвикаат разни негативни ефекти кои влијаат на психичката и емоционалната состојба на студентите.

Стресот од испитната сесија и тоа како знае да влијае врз животот на студентите:

• Паника: од студентите се очекува да се справуваат со голем број испити и проекти во краток период, што предизвикува паника кај секој студент.
• Депресија и намалена самодоверба: постојат студенти кои се справуваат со депресија за време на испитната сесија поради притисокот и очекувањата кои ги имаат. Исто така, ако не ги постигнат очекуваните резултати, може да имаат намалена самодоверба и да се чувствуваат неуспешно.
• Несоница: учењето до доцните часови во ноќта резултира со несоница која знае да се пролонгира со денови.
• Здравствени проблеми: долготрајниот стрес може да предизвика разни физички здравствени проблеми кај студентите, како што се главоболка, стомачни проблеми и имунолошки проблеми.

За да се намали влијанието на стресот од испитната сесија врз менталното здравје на студентите, важно е да се имплементираат здрави начини за справување со стресот. Вежбањето, релаксацијата, здравата исхрана и социјализацијата се само некои од начините кои можат да помогнат во овој процес. Исто така, важно е студентите да побараат поддршка од пријателите, семејството, како и да се обратат за помош кај професионални психолози или психотерапевти доколку имаат сериозни проблеми со своето ментално здравје.