Лицата со попреченост и понатаму наидуваат на пречки при остварување на многу од нивните права, покажува анкета на организацијата „Полио плус“.

Над 50 проценти од лицата со попреченост во анкета спроведена во рамки на проектот „Алијанса по прашањето хендикеп за развојни и инклузивни реформи во регионот“ се изјасниле дека нема соодветни рампи за пристап, а над 60 проценти изјавиле дека нема паркинг простор за лицата со попреченост.

Податоците од анкетата покажуваат дека 77 проценти од испитаниците кажале дека наидуваат на непристапни ходници, а 75 проценти дека нема тактилни патеки и пристапен тоалет.

Фото: МИА

Во однос на остварувањето на правото на пристапност во здравството, податоците покажуваат дека 76 проценти од испитаниците  користат придружник при посета на здравствените установи, а само 42 проценти од лицата со физичка и 43 проценти од лицата со интелектуална попреченост одат сами во здравствените установи. Педесет и шест отсто од испитаниците  велат дека немаат пристап до соодветни или разбирливи информации во здравствените установи.

Испитаниците со попреченост реагираат на огромен број на попречувања и проблеми

Учесниците на дебатата, што ја организираше Организацијата на лица со попреченост „Полио плус“ за имплементација на Конвенцијата за правата на лицата со хендикеп и нејзина хармонизација со македонското законодавство, се согласија дека недостигот на пристапност се смета за дискриминација и дека тоа е пречка во достигнувањето еднакви можности и права.

Фондацијата „Чекор по чекор“ со обука за лица со попреченост

Според Наташа Амдију, стручна соработничка на „Полио плус“, нештата околу правата на овие лица се придвижуваат кон подобро, но тоа оди многу бавно и многу работи стојат во место.

– Имплементацијата на Конвенцијата и подигањето на општествената свест мора да одат заедно. Механизми (за спроведување) постојат, но многу малку се спроведуваат, смета Амдију.

Во однос на правото на граѓаните со попреченост да учествуваат во политиката беше посочено дека испитувањата покажуваат дека дел од политичките партии декларативно искажуваат подготвеност да истакнат лице со попреченост на своите избирачки листи, но дека тоа во практика се избегнува.

Суарет Алишан, долгогодишен гласноговорник и поборник на лицата со попреченост, ги повика македонските власти да ги заштитат  со посебна измена во Уставот.