Загриженост за состојбата на новинарството во Македонија и плановите за повторно враќање на државното рекламирање во приватните медиуми изразија претставници на меѓународните новинарски и медиумски здруженија, кои денеска заедно со Здружението на новинарите на Македонија ги презентираа своите впечатоци од состаноците кои изминативе денови ги имаа со првите луѓе на сите клучни институции во земјава.

Претседателот на ЗНМ, Младен Чадиковски на заедничка прес конференција со странските партнерски организации

Алабана Шала од „Free Press Unlimited“ укажа на проблемот со неказнивост, кога станува збор на нападите кон медиумските работници, но и на проблемот со можната промена во законот кој се однесува на делот за државно рекламирање.

Рикардо Гутиерез, директорот на најголемата новинарска организација во Европа (ЕФЈ), ја истакна загриженоста за состојбата на новинарството во Македонија како и потребата од формирање на фонд за медиумски продукти како начин да се подобри медиумската содржина и да се промовира јавниот интерес.

Лоренс Хутинг од Европскиот центар за медиумски слободи (ЕЦПМФ) се задржа на инцидентите кога политичари на јавна сцена се обидуваат преку непримерен говор да ги дискредитираат новинарите.

Претседателот на ЗНМ, Младен Чадиковски, рече дека е задоволен што со поддршка на странските партнери се отвора дебата со Владата за формирање на фонд за плурализам за сите медиуми како и согласност за подобрување на транспарентноста на владините институции преку обележување на соопштенијата, видеата и фотографиите со водени жигови. Само вака јавноста ќе прави разлика помеѓу новинарски производи и владина комуникација. Освен ова, интензивирани се напорите за реформите во јавниот сервис како и во медиумскиот регулатор, но и за подобрување на статусот на локалните дописници.