Меѓународниот проект Newaves, кој се спроведува во рамките на меѓународен конзорциум предводен од Политехничкиот институт од Гуарда, Португалија, активно напредува со планираните активности во сите работни пакети. Една од главните задачи на овој проект, креирање на платформа како ресурсен центар за локалните радио станици, ги помина првите тест фази. Делот од платформата која треба да служи за проверка на вести со употреба на вештачка интелигенција  успешно ги помина двете фази на тестирање. Првата фаза беше извршена од страна на португалскиот тим, додека втората вклучи учество на целиот конзорциум. Овие тестирања се основа за финализирање на платформата пред нејзиното официјално пуштање во употреба., која ќе биде од огромно значење за локалните радио станици, ќе им понуди можност за огромни ресурси кои ќе ја збогатат нивната програма и тоа бесплатно. Сите вклучени радио станици ќе имаат достап до платформата и ресурсите кои истата ги нуди, а во иднина пристап ќе добиваат и останати заинтересирани радио станици од Европа. Од Македонија како дел од проектот се Универзитетот „Гоце Делчев“ со својата радио станица и радиото „Канал 77“.

Од останатите актвности на овој проект Конзорциумот се подготвува за третата средба, која ќе се одржи во Братислава, Словачка, последната недела од јануари 2025 година. Средбата ќе биде клучна за оценка на досегашниот напредок и за планирање на наредните чекори.

Воедно, завршена е подготовката на материјалите за обуки, кои опфаќаат четири модули изработени од експерти во проектот. Дополнително, тимот на Универзитетот „Гоце Делчев“ го изготви Протоколот за мобилност на радио работници (Radio Worker Mobility Programme Protocol). Во тек се подготовки за обуката која ќе се одржи во мај 2025 година во Осијек, Хрватска.

Проектот Newaves, финансиран од програмата „Креативна Европа“, има за цел да ја поддржи дигиталната трансформација на локалните радиостаници во региони со ниска густина на население. Проектот обединува партнери од Португалија, Хрватска, Северна Македонија и Словачка, и се фокусира на создавање дигитална платформа за споделување аудио содржини, како и програма за мобилност на радиоработници.

Проектот Newaves продолжува да демонстрира посветеност во унапредувањето на мобилноста и развојот на радиодифузните професионалци низ Европа.