Законот за младински политики од 2020 години предвидува поголемо вклучување на младите во младинските политики преку различни форми на учество. За жал и после две години учеството на младите во политиките на локално ниво е на ниско ниво. Од мониторингот на неколку невладини организации може да се заклучи дека младите се уште слабо се вклучуваат. Клучните наоди на истражувањето се:

• Вклучувањето на младите не е приоритет за општините и повеќето доцнат со реализацијата на законските обврски.
• Иако според законот, општините требаше да имаат локални младински совети до јануари 2021 година, во три (Куманово, Струмица и Велес) од седумте мониторирани општини сè уште не е формиран локален младински Совет.
• Слична е состојбата и со формирањето младински центри, кои според Законот за младинско учество и младински политики треба да бидат формирани до 2024 година.
• Во некои општини сè уште нема отворено канцеларија за млади.

Драгана Митровиќ од Сојуз за Младинска Работа вели дека минатата година се отвориле пет Младински Центри низ државата, но дека се уште има многу работа.

Драгана – Дина Митровиќ

2022 година ја заокруживме со 5 отворени Младински Центри согласно Законот за младинско учество и младински политики и Правилникот за стандарди за квалитет на младински центри (во Пробиштип, каде го очекуваме свеченото отворање по празниците, Охрид, Велес, Куманово и Кавадарци) и 1 за кој е завршена постапката и останува уште да се потпише Договорот за управување со организациите (во Битола).  Во државата постојат уште неколку младински простори/центри кои се функционални и поддржани од Општините, и, за тие се надеваме дека успешно ќе бидат трансформирани согласно Законот и Правилникот што е можно поскоро. Исто така, од неколку други општини е најавено дека скоро ќе ја започнат постапката, некои имаат определено простори, а дел имаат определено средства во буџетите за 2023, вели Драгана Митровиќ.

Од Општина Штип потврдуваат дека изминатите години активно работат на вклучување на младите и имплементирање на законот за млади и дека овде неодамна се формираше Младинскиот совет.

Општина Штип во изминатиот период активно работеше на спроведување на административната постапка утврдена согласно со закон за младинско учество и младински политики како и препораките од Агенција за млади и спорт. Во рамки на процесот Општина Штип во моментов има функционално Локално собрание за млади, коешто согласно одредбите за закон за младинско учество и младински политики ( односно својот мандат ) на претходната седница преку спроведување на избори ги избра членовите на Локалниот младински совет при Општина Штип. При тоа, во моментов во тек се завршуваат и последните процеси ( барањето на согласност од страна на Совет на Општина Штип ) по основ на изборот на членови во Локален младински совет, вели шефот на кабинет во Општина Штип, Трајче Здравков.

Законот од 2020 година предвидува зголемено учество на младите заради фактот дека младите ретко се вклучуваат во носењето одлуки и политики кои ги тангираат нивните проблеми и предизвици.