Новата концепција за полагање матура што ја подготвува и ја најавуваше Државниот испитен центар (ДИЦ) ќе почне да се применува од учебната 2022/23 година. Ова значи дека и годинава, матурантите ќе полагаат државна матура исто како ланската генерација, која полагаше два наместо три изборни предмети, а се избори и за скратени испитни програми. Сево ова беше последица на многуте проблеми со кои се соочи образовниот систем поради пандемијата.

Директорката на Државниот испитен центар Елизабета Наумовска за националната новинска агенција МИА изјави дека новата концепција за матура ја планираат за 2023 година зашто ставот е дека и за овие ученици, пандемијата е хендикеп  и иако во септември почнаа да одат во училишта, лани и преклани имаа скратени програми.

– Го чекам новиот министер за да договориме широка јавна дебата за новата концепција за матура. Можеби ќе ја организираме напролет откако ќе се смири КОВИД-состојбата која овој месец е поексплозивна. Најпрво сакам да се дебатира со самите средношколци, не само со годинашните матуранти, туку и со тие што в година ќе бидат матуранти бидејќи за нив ќе се однесува новата концепција, како и со професори и директори од средните училишта, со претставници од високото образование и потоа со пошироката јавност, изјави Наумовска.

Родители бараат почеток на второто полугодие со онлајн настава

Со новата концепција за идната генерација матуранти се предвидуваат три вида државна матура,  според видот на образование – гимназиско, стручно и уметничко.

За годинава државната матура нема да се менува. Учениците ќе полагаат два екстерни и два интерни предмети и една проектна задача. Ќе има проширување само на листата интерни предмети за учениците во средното стручно образование поради нови образовни профили кои претходно не постоеја, за што  Државниот матурски одбор, како што рече Наумовска, пред околу еден месец одржал состанок и се направени мали измени.

ДИЦ веќе ги закажа датумите за екстерните испити од учебната 2021/2022 година во јунската испитна сесија – на 4 јуни матурантите ќе бидат тестирани по мајчин јазик (македонски, албански или турски јазик и литература) и на 13 јуни ќе биде тестот по  математика, англиски јазик, француски јазик, германски јазик, руски јазик, филозофија или естетика.

Учениците што ќе полагаат државна матура во јуни до крајот на декември имаа обврска да се пријават во училиштата кои, пак, до 20 јануари имаат рок да ги ажурираат податоците во електронската база на ДИЦ. Наумовска додаде дека на училиштата им дозволуваат тоа да го направат до крајот на месецов и тогаш  ДИЦ ќе има точен број на кандидати за државна матура и кои предмети ги избрале за екстерните испити.

Државната матура во земјава се спроведува од 2007 година. На крајот на 2019/2020 првпат не беше организирана поради КОВИД-19, а на барањето на минатогодишните матуранти да им бидат олеснети условите, бројот на екстерни испити беше намален од три на два односно третиот екстерен беше спуштен на ранг на интерен испит.

Матурата во јуни 2021 ја полагаа околу 15 300 ученици. Средната оценка од двата екстерни испита беше 3.61 и подобра од претходната државна матура, во 2019 година, кога просечниот успех беше 3.48.