Осум средни училишта во Скопје денеска преку е-маил примиле нови дојави за поставени бомби, а во моментов се прават антитерористички проверки на локациите на училиштата, информираат од МВР.

Ова е прва дојава за поставени бомби по повеќе од еден месец. Последен пат имаше дојава за бомба имаше на крајот на минатата година, пред почетокот на зимскиот распуст на учениците.

Photo by kyo azuma on Unsplash

„Денеска околу 11.40 часот во СВР Скопје е пријавено дека на електронска адреса на осум средни училишта во Скопје е упатена закана за поставена експлозивна нaправа. Веднаш по добиената пријава, од полициски службеници се преземени мерки за безбедно евакуирање на училиштето и во тек се антитерористички проверки и се преземаат мерки за расчистување на случајот“, соопштија од МВР.

Од 26 октомври минатата година во повеќе од 20 наврати се пријавуваат дојави за бомби низ државата. Покрај во основни и средни училишта изминативе месеци имаше дојави за поставени експлозивни направи и во Народната Банка, полициска станица, Министерството за надворешни работи, Транспортниот центар и повеќе трговски центри и станбено-деловни комплекси. Досега беше утврдено дека сите дојави се лажни.