Универзитетот „Гоце Делчев“ во Штип денес ги објави прелиминарните ранг-листи од првиот уписен рок за академската 2026/2027 година. Сите кандидати кои ги поднесоа своите апликации веќе можат да го проверат својот статус и место на ранг-листите преку студентскиот портал или официјалната страница за уписи upisi.ugd.edu.mk 

Над 1.150 кандидати во трка за место – силна конкуренција меѓу средношколците

Според првичните податоци од УГД, во оваа фаза пристигнале околу 1.150 пријави за студиските програми , со што се пополнети над 70% од местата предвидени во државна квота. Годинава конкуренцијата е особено силна, а меѓу апликантите се голем број првенци на генерацијата, освојувачи на државни и меѓународни награди и признанија.

За успешниот уписен рок, проректорот за настава на УГД, проф. д-р Сашо Коцески, истакна:

„Универзитетот ‘Гоце Делчев’ и оваа година останува атрактивен за голем број средношколци. Радува фактот што имаме голем број талентирани ученици. УГД на своите идни студенти ќе им овозможи одлични можности за студирање и научно усовршување, како и можности за мобилност и вмрежување преку Европската алијанса ACE2EU и програмата Еразмус+.“

Кои факултети бележат најголем интерес?

• Медицински науки: Традиционално, барањето место повеќе продолжува на Факултетот за медицински науки. Местата за Општа медицина и Дентална медицина се целосно пополнети уште во првиот рок, а остануваат уште сосема мал број слободни индекси за Фармација.

• Општествени и технички науки: Забележителен раст на пријави има на Економскиот и Правниот факултет, Факултетот за туризам и бизнис логистика, додека кај техничките науки предводат Факултетот за информатика и Факултетот за природни и технички науки.

• Македонски јазик: Позитивен тренд и стабилен интерес се бележи и за студиите по Македонски јазик и литература.

ШТО ПОНАТАМУ? Клучни датуми кои мора да ги запомниш:

Ако веќе ги провери прелиминарните резултати, еве кои се следните чекори:

• 27 август (утре): Рок за поднесување приговори доколку забележиш каква било неправилност во бодувањето.

• 31 август: Објавување на конечните ранг-листи и решенија за прием.

• 1 – 3 септември: Официјално запишување на примените студенти.

Пропушти да аплицираш во првиот рок?

За сите кои не успеаја да аплицираат или сакаат да го променат својот избор, вториот уписен рок започнува на 3 и 4 септември. Пријавувањето продолжува преку онлајн системот eupisi.ugd.edu.mk, а документите може да се достават во пунктовите во Штип, Скопје, Струмица, Кавадарци и Гевгелија.