Министерството за образование и наука ги објави резултатите од Конкурсот за доделување стипендии за ученици запишани во Државното средно училиште „Спортска академија“ за учебната 2022/2023 година.

Објавен е списокот со 156 ученици кои ги исполнуваат условите од Конкурсот. Добитниците на стипендии треба до 21 ноември 2022 да го потпишат договорот за стипендија со Министерството за образование и наука, кој е достапен на веб-страницата на МОН.

-Сите кандидати кои нема да го почитуваат овој рок ќе се смета дека се откажуваат од стипендијата, наведува МОН во објавата на резултатите.

Стипендијата за ученици во ДСУ „Спортска академија“ е во месечен износ од 3.500 денари и се добива во текот на учебната година сè додека корисникот ги исполнува условите.

МОН предложи нови категории стипендии

Министерството за образование и наука упати предлог до Владата на Република Северна Македонија за воведување на нови категории на студентски стипендии, за кој Владата на својата последна седница донесе позитивна одлука. Од Владата соопштуваат дека со предложените измени се воведуваат нови мотивирачки стипендии за студенти запишани на додипломски студии од прв циклус на државните и приватните универзитети и високообразовни установи, на студиски програми од областа на земјоделските, ветеринарните и шумарските науки.

Стипендии за професионална пракса во Германија

Воведувањето на новите стипендии ќе се реализира во рамките на предвидените буџетски средства на МОН, од кое се очекува деновиве да го распише и конкурсот за студентски стипендии за академската 2022/23 година.

Во месец август 2022 година, од Министертсвото за образование соопштија дека од оваа година, поради недостиг на кадар во одредени области, ќе бидат воведени и категории на стипендии наменети за студентите запишани на студиски програми за преведување и толкување, како и за студенти на студиски програми по историја на уметност, археологија, ликовна уметност и етнологија и антропологија.