Лична карта и возачка дозвола на телефон – од четврток стартува новина која носи низа предности за граѓаните и заштита на нивната приватност.

Од четврток веќе почнува официјалната примена на електронскиот паричник што значи дека граѓаните ќе можат на својот мобилен телефон да ги имаат својата лична карта и возачка дозвола.

– Корисниците нема да мора да ги откриваат сите свои податоци, како што тоа го правиме сега кога ги покажуваме пластичните лични карти или возачките дозволи. На пример, кога сакате да се легитимирате во банка, бар или друг локал, нема да мора да ги покажувате сите податоци од личната карта.

Ќе можете сами да изберете кои податоци сакате да ги споделите, на безбеден начин. Податоците ќе се споделуваат преку QR-код, кој се генерира за еднократна употреба. Кодот се скенира, а другото лице ги добива податоците само доколку вие го дозволите тоа. По 10 до 15 секунди, QR-кодот истекува и не може повторно да се употреби. Многу внимание посветивме на безбедноста – појаснува Андоновски.

Свидетелствата во иднина ќе бидат електронски

– Ова е почеток на еден процес што треба да нè доведе до европскиот дигитален паричник, кој ќе значи целосна дигитализација на документите. Одличен почеток затоа што основните податоци од личната карта и возачката дозвола ќе им бидат достапни на граѓаните.

Се надевам дека паралелно со развојот на мобилниот паричник, ќе додаваме и нови услуги, можности и документи за граѓаните – изјави денеска Андоновски пред почетокот на панел-дискусијата „Предуслови и предизвици за забрзана дигитализација на приватниот сектор“, што се одржа во просториите на ИНОФЕИТ ЕДИХ во Скопје.