По повод Меѓународниот ден на танцот, АКАДЕМИЈА ЕУРОАРТ – Штип зеде учество на меѓународен фестивал во Бугарија.

,,На Фестивалот се претставивме со дел од нашиот репертоар. Би ги споменала ората: ,Потрчулка’, ,Џонка’, ,Копачка’, ,Крстач’. Посебно ја истакнувам нашата премиерна изведба на сплетот ,Радовишки собор’“, вели Валерија Спасова, член на Етнокореолошката школа на ЕУРОАРТ.

Младите фолклористи пред настапот имаа и дефиле што се реализираше пред многубројна публика.

,,Македонското знаме, македонските носии и неповторливиот ритам на тапаните, беа причина повеќе за изблик на нескриени емоции. Среќни сме што по две години повторно сме дел од ваква турнеја со наше меѓународно претставување”, истакна Милена Милорадова, член на Академија ЕУРОАРТ.

Исклучителни се впечатоците од учеството во Семинарот за фолклорни игри во рамки на овој фестивал.

,,Добивме силни аплаузи и преубави зборови од публиката и од организаторите. Семинарот беше посебно искуство за нас или прв семинар од ваков карактер надвор од Македонија”, со задоволство вели Петар Стојанов од ЕУРОАРТ.

Сите учесници од фолклорните друштва, кои беа дел од овој фестивал, се сплотија преку играње на заеднички ора во повеќе наврати за времетраeњето на Фестивалот.

,,Скоро триeсет члена од ЕУРОАРТ го претставија повеќе од достоинствено македонскиот фолклор во Бугарија. Во претходниов период, пандемијата го спречи патувањето надвор од Македонија, но нè поттика поинтензивно да се подготвуваме за вакви настапи во рамки на нашите Пролетни, Летни и Есенски фолклорни кампови. Почестени сме со поканата и благодарни на сите кои ни помогнаа да ја оствариме оваа турнеја”, вели проектната раководителка на АКАДЕМИЈА ЕУРОАРТ, Милена Ристова-Михајловска.

Инаку, меѓународниот фестивал беше во организација на Народното читалиште „Просвета 1865“ и Општина Гоце Делчев, Бугарија.