Генералното собрание на Сојузот на средношколци на вонредна седница го прифатил компромисот понуден од Министерството за образование и наука (МОН) во врска со едно од нивните барања за државната матура.

Фото: FB Сојуз на средношколци

На средбата со министерот Јетон Шаќири во МОН, на претставниците на Сојузот им било укажано дека поради утврдениот календар за настава не може да се одложи првиот екстерен испит (Мајчин јазик и литература) од 27 мај за 3 јуни, но им бил понуден компромис – намален обем на тестот и олеснување во бодувањето. Сојузот најави дека за понудата ќе решава нивното Генерално собрание.

–Генералното собрание по долга дискусија ја прифати алтернативната понуда на МОН – наместо одложување на датумот на првиот екстерен испит, да се намали обемноста на испитот. Тој ќе носи од 60 до 80 бодови, наместо досегашните од 80 до 100, што значи дека ќе има намалување на бројот на прашања – информира Сојузот на средношколци во допис до медиумите.

Сојуз на средношколци: Не смее да се укинe еден интерен испит, тоа не е во интерес на матурантите

Во дописот се истакнува дека успешно е постигнат договор со МОН за државната матура и таа ќе биде приспособена на состојбата во образованието и ќе биде олесната за оваа генерација матуранти која, како што вели, беше најмногу погодена од прекините на наставата.

Сојузот на средношколци и МОН посртигнаа договор, Универзитетите треба да се прилагодат во конкурсите

Инаку,Сојузот на средношколци имаше четири барања од кои три вчера беа веднаш прифатени од МОН, а за четвртото, т.е. за барањето да се одложи почетокот на полагањето на матурата им го понуди компромисот за намалување на обемот на тестот.

Фото: FB Сојуз на средношколци

На вчерашната средба во МОН беше постигнат договор за промена на соодносот на поените што ги носат испитите од државната матура при уписот на факултет – наместо 24, екстерните да носат 20 поени, а интерните наместо 12 да носат 16 поени.

Министерството за образование и наука преку Владата ќе им препорача на универзитетите да направат ваква промена во конкурсите. Исто така, на универзитетите ќе им биде препорачано првиот екстерен испит – мајчин јазик (македонски, албански, турски) и литература да се смета за соодветен на сите студиски програми, што значи дека оценката од овој испит ќе се множи со повисок коефициент. Со тоа, матурантите ќе добијат додатни два поена при упис поради оваа промена, а државата ќе покаже грижа за важноста на мајчиниот јазик и литература, нагласува Сојузот.

Ќе се прифатат барањата за државната матура што имаат законска основа, вели министерот Јетон Шаќири

Договорено е, исто така, наставниците да ги споделат банките со прашања за интерните испити најдоцна четири недели пред испитот и банките да содржат трипати поголем број на прашања од бројот на прашања на испитот. Тоа е значајно олеснување за матурантите, сметаат од Сојузот на средношколци, бидејќи матурантите ќе имаат доволно време да се подготват и за интерните испити.