
Владата најавува повисока субвенција и нов дигитален систем за студентски оброк, но конкретниот износ сè уште не е соопштен. Во меѓувреме, собранискиот амандман за зголемување на дневната поддршка на 200 денари не доби поддршка.
Субвенционираниот студентски оброк и понатаму останува во износ од 140 денари дневно, откако предлогот за негово зголемување на 200 денари не доби поддршка во Собранието.

Од друга страна, Владата најавува нов модел на субвенционирање, со повисока финансиска поддршка и дополнителни попусти за студентите, чија примена се очекува од почетокот на следната академска година.
Амандманот за зголемување на дневниот износ од 140 на 200 денари беше поднесен од СДСМ во рамки на расправата за вториот ребаланс на Буџетот за 2026 година. Со него се бараше дополнително издвојување од 200 милиони денари, односно околу 3,25 милиони евра, за зголемување на субвенцијата. Предлогот беше дел од вкупно 124 амандмани поднесени од опозицијата, кои не добија поддршка од парламентарното мнозинство.
Паралелно со собраниската расправа, Владата и студентските претставници разговараат за промена на досегашниот начин на субвенционирање. Предложениот модел предвидува зголемување на месечната поддршка од досегашните 3.500 на 4.500 денари, воведување посебна дигитална услуга преку платформата „М-услуги“, како и дополнителни попусти при купување храна во вклучените угостителски и трговски објекти.
Организацијата „Студентски отпор“ го прифати предложениот модел, но постави два услови: договорените решенија да бидат внесени во Законот за субвенциониран студентски оброк и списокот на компаниите и маркетите во кои ќе може да се користи субвенцијата да биде јавно објавен пред стапувањето на законските измени во сила.
Последната најава на премиерот Христијан Мицкоски е дека новото решение ќе започне да се применува од почетокот на следната академска година. Како причина за подоцнежната примена ги посочи потребните софтверски интервенции за интегрирање на системот во платформата „М-услуги“.
Иако новиот модел ветува поголема финансиска поддршка, сè уште нема конечна потврда за точниот износ, ниту за датумот на неговото стапување во сила. До тогаш, студентите продолжуваат да го користат актуелниот систем, со дневна субвенција од 140 денари.
Прашањето за студентскиот оброк останува отворено, особено во услови на зголемени трошоци за живот и храна, а клучното прашање за студентите веќе не е само како ќе ја користат субвенцијата, туку и колкава реална поддршка ќе добијат од државата.