Пред околу еден месец беше формирано студентското здружение „Дентум“ од страна на студентите по Дентална медицина на Факултетот за медицински науки при Универзитет „Гоце Делчев“ Штип.

Здружението е основано со визија да биде мост помеѓу академските знаења и реалната стоматолошка практика, преку активности кои вклучуваат: едукативни настани, хуманитарни настани, јавни трибини, и промоција на оралното здравје.

„Верувам дека преку оваа иницијатива ќе создадеме платформа каде секој студент ќе може да се изрази, да учи и да расте. Нашата мисија е да изградиме заедница која ќе ги поврзе студентите од сите насоки на ФМН, преку активности што промовираат стручен развој, тимска работа и ангажман во здравствената едукација. Веруваме дека Дентум може да биде простор каде идеите се слушаат, различностите се вреднуваат, а заедничките цели не’ обединуваат.“, вели Дијана Цветановска, претседател на здружението.

Во наредниот период, здружението Дентум планира да реализира низа активности насочени кон подобрување на студентскиот ангажман и развој. Акцентот ќе биде ставен на организирање на едукативни предавања, практични работилници и јавноздравствени кампањи, кои ќе овозможат студентите да се вклучат во реални процеси, надвор од теоријата. Дентум останува посветен на создавање активна и инспиративна средина во која секој студент ќе има можност да се развива – и лично и професионално.

„Дентум“ ќе им овозможи на студентите да гледаат подлабоко во професијата – надвор од книгите и оценките

Во време кога здравствената едукација и интердисциплинарниот пристап се сè поважни во медицинските науки, здружението Дентум претставува платформа која им овозможува на студентите да ги прошират своите знаења, да ги усовршат практичните вештини и да воспостават контакти со професионалци од различни области. Преку своите активности, Дентум не само што придонесува за подготовка на студентите за идните професионални предизвици, туку и отвора можности за вклучување во научноистражувачки проекти, размена на искуства и градење на мостови за идни соработки.

Асистентка на УГД: Студентите по медицина не треба да се разочаруваат и да се откажуваат

„Чувствувам искрено задоволство што конечно формиравме здружение кое долго време го замислувавме. Сметам дека Дентум ќе им овозможи на студентите да гледаат подлабоко во суштината на нашата професија – надвор од книгите и оценките. Ќе работиме на создавање простор каде што ќе можеме да разговараме за реалните предизвици во стоматолошката пракса, да разменуваме искуства и заеднички да учиме од и од професионалци и од самите себе. Верувам дека Дентум ќе биде место каде љубопитноста, науката и посветеноста ќе се сретнат на вистински начин.“ – вели Генералниот секретар на здружението Андреа Василоска.

Раководниот одбор на Дентум ги повикува сите студенти кои сакаат да бидат дел од активна, инспиративна и професионално насочена заедница да се приклучат. Пријавувањето е отворено до 5.6.2025(четврток).