„Точка, а не круг“ е изложба на слики на Бојана Тошевска, млада уметничка од Ликовната академија при Универзитет „Гоце Делчев“ во Штип. Изложбата ќе биде отворена на 28.12.2024 (сабота), во просториите на Дом на култура „Наум Наумовски-Борче“ во Крушево со почеток од 15:00 часот.

Според Тошевска, изложбата претставува кулминација на нејзиното академско творештво, со големо емотивно значење .Целта на изложбата е  и да да понуди увид во дел од нејзиниот уметнички свет кој сè уште е непознат за јавноста.

„Оваа изложба за мене претставува повеќе од уметнички настан – таа е симбол на завршување и почеток, одраз на една фаза од мојот живот која ја заокружувам со благодарност. Во неа гледам шанса да ги споделам делата кои долго време постоеле само во мојот интимен простор, како чувани тајни. Секое од овие дела е сведоштво за моментите на инспирација, борба, сомнежи и раст кои го обележаа мојот пат. Изложбата е мој личен дијалог со публиката, но и со самата себе, каде ја славам можноста да стојам пред нешто ново, а истовремено го вреднувам патот кој ме донесе до тука.“, вели таа.

На изложбата ќе бидат претставени 20 класични слики со уникатна тематика и порака.

Тошевска ги опишува своите дела како парчиња од мозаик, поврзани со еден заеднички мотив. Нејзината цел и замисла е публиката да се чувствува како да патува низ временска линија на нејзиното творење и созревање. Мотивите кои таа ги опишува низ делата се  љубопитноста за животот, љубовта кон уметноста и потребата да се раскаже приказната за човечката емоција, природа и општество.

Пораката која се крие зад насловот „Точка, а не круг“ е потсетник за надежта и новите можности.

„Точка, а не круг“ ја отсликува суштината на оваа изложба. Точката е крај, но не и затворен круг

„Точка, а не круг“ ја отсликува суштината на оваа изложба. Точката е крај, но не и затворен круг – таа е пауза, момент на рефлексија и место од каде што се тргнува во нов правец. За мене, точката е симбол на храброста да се остави нешто зад себе, без да се враќаш повторно на истото. Со оваа изложба, го затворам поглавјето на моето академско сликарство, кое беше долгогодишна основа на моето изразување, и го отворам патот кон нови, помодерни или поинтимни начини на изразување. Во точката гледам и лична метафора – тоа е момент на одлука и промена, но и знак за завршен процес кој има вредност и тежина.

„Точка, а не круг“ значи дека не се враќам назад во истото, туку ја продолжувам линијата напред, создавајќи нови перспективи и можности. За мене, таа точка не е само дел од изложбата, туку и мојата филозофија за животот: сè што завршува, создава простор за нешто ново.“, вели Тошевска.