УНИЦЕФ Македонија покрена иницијатива за преземање мерки за поддршка на децата во училиштата, со акцент на нивното ментално здравје.

Претставници од УНИЦЕФ, Министерството за образование и наука и Бирото за развој на Образованието  имале средба со тим од професионалци и експерти за ментално здравје. Тема на разговорот биле итни активности коишто ќе обезбедат дополнителна поддршка на децата во последните шест недели од оваа учебна година.

Image by rawpixel.com on Freepik

Канцеларијата на УНИЦЕФ во Скопје информира дека состанокот бил организиран поради загрижувачките вести за сè поголем број деца кои чувствуваат анксиозност и страв.

Според истражувањата на УНИЦЕФ, има сè поголем број деца кои чувствуваат анксиозност.

Професионалците и експертите присутни на состанокот потврдиле дека анксиозноста и стресот кај децата се зголемени. Ова особено е актуелно по неодамнешниот бран закани со бомби во училиштата во земјава. На децата лошо влијае и изложеноста на вести за трагичниот настан во училиштето во соседна Србија.

„На состанокот се постигна согласност дека е потребно вклучување на целото општество за да се овозможи училиштето да остане безбедно место за сите деца и за да се обезбеди советување и поддршка на децата во сите услови, нагласувајќи дека е неопходно во следните недели да се преземат итни дејствија“, соопшти УНИЦЕФ.

Потребите на поддршка на менталното здравје на децата не смее да се игнорираат

Според УНИЦЕФ, потребите за поддршка на менталното здравје на децата и младите не смеат да се игнорираат и потребна е дополнителна и итна поддршка на менталното здравје на децата и младите во училиштата.

Image by Freepik

„За оваа цел, УНИЦЕФ ги повикува раководствата на училиштата да се погрижат стручните соработници, односно психолозите, педагозите, специјалните едукатори и другите да бидат целосно посветени во обезбедување поддршка за децата и колегите во последните шест недели од учебната година“.

Дополнително, кога се работи за прашања кои ги засегаат децата, најдобриот интерес на сите деца мора да биде во фокус на секоја одлука донесена од страна на заедницата и Владата.

Во соопштението се потенцира и значењето и улогата на јавноста и медиумите. Тие треба да промовираат превенција и ресторативен пристап во справување со прашања поврзани со насилство меѓу деца, наместо казнени мерки и политики. Исто така, треба да се воздржат од користење терминологија која поттикнува стигматизација кога станува збор за деца.

Системот е најголем виновник за трагедиите како онаа во Србија

За спречување на сите форми на насилство и справување со предизвиците поврзани со менталното здравје, наведува УНИЦЕФ, потребно е вклучување на целото општество и користење пристап кој се фокусира на превенција, градење отпорност, промовирање добросостојба и обезбедување специјализирана поддршка тогаш кога е потребна.

„Ова вклучува родителите да имаат пристап до програми за родителство; училиштата да овозможат безбедна и поттикнувачка средина за учење и децата да имаат пристап до услуги и поддршка за ментално здравје; а посебни услуги да бидат достапни за сите деца на кои им е потребна специјализирана поддршка“, соопшти Канцеларијата на УНИЦЕФ.