Сè повеќе студии покажуваат дека долгото користење на социјалните мрежи кај младите го зголемува нивото на анксиозност и предизвикува проблеми со спиењето. Постојаната споредба со други, притисокот од коментарите и непрекинатото скролирање ги прават младите повеќе стресирани и уморни, а родителите честопати пријавуваат дека децата не можат да се одморат и поминуваат премногу време на телефоните.

Како резултат на тоа, неколку земји веќе почнуваат да воведуваат ограничувања за користење на социјалните мрежи кај деца и тинејџери.

Најновата одлука доаѓа од Грција, каде што премиерот Кириакос Мицотакис најави забрана за користење на социјални мрежи за деца под 15 години, која ќе стапи на сила од 1 јануари 2027 година. Мицотакис објасни дека целта е да се намалат анксиозноста, проблемите со сонот и зависноста од онлајн платформите. Тој истакна дека продолженото користење на екраните спречува умот да се одмори и создава дополнителен притисок за младите поради постојаната споредба со другите.

Телефоните се забранети во училиштата во Грција

Грција веќе ги забрани мобилните телефони во училиштата и воведе платформи за родителска контрола, со цел ограничување на времето што тинејџерите го поминуваат онлајн. Прашалник спроведен во февруари покажа дека околу 80% од испитаниците го поддржуваат воведувањето на таква забрана.

Оваа иницијатива на Грција доаѓа по примерот на Австралија, која минатата година стана првата земја во светот што ги блокираше социјалните мрежи за деца под 16 години. Слични забрани се разгледуваат и во Словенија, Велика Британија, Австрија и Шпанија, кои веќе најавија мерки за ограничување на пристапот на најмладите до онлајн платформите.

Во Велика Британија, на пример, во моментов се спроведува пилот-програма со 300 тинејџери на возраст од 13 до 17 години, каде што се тестираат забрани, ограничувања на времето за користење. Истражувачите ги следат ефектите врз училишните резултати, сонот и семејниот живот, со цел да се развијат ефективни мерки за заштита на младите во дигиталниот свет.

Со овие мерки, земјите се обидуваат да создадат посигурна онлајн средина за децата и да го намалат влијанието на социјалните мрежи врз нивното психичко здравје.