Денеска започна второто полугодие од учебната 2022/23 година. Почетокот беше одложен, бидејќи наставата по зимскиот распуст требаше да започне на 18, но стартот беше поместен за 23 јануари. Поради ова имаше најава дека и крајот на учебната година ќе биде поместен. Образложението од МОН беше дека причината е функционалноста на училиштата. Став на Министерството е и дека ќе има време да се одработат сите предвидени часови.

Photo by Taylor Flowe on Unsplash

„За подобро функционирање на процесот, поради тоа што 18 јануари е среда, 19-ти е празник за поголем дел од граѓаните и 20-ти е петок, одлучивме второто полугодие да почне во понеделник. Исто така, да се изработат сите 180 работни денови до крајот на ова второ полугодие. Има три работни наставни денови и не гледам причина да има некаков проблем“-изјави тогаш Министерот за образование и наука, Јетон Шаќири.

Второто полугодие започнува во знакот на старите проблеми – немањето учебници.    На почетокот на второто полугодие учениците од второ одделение ќе ги добијат учебниците по математика и општество, најави министерот Шаќири. Тој најави и дека Министерството утврдило дека има потреба од нов Закон за учебници, со кој ќе се минимизираат можностите за грешки и доцнење. Изразува уверување дека следниот септември дел од проблемите кои се појавија во минатото нема да се повторат.

Никој не прифаќа одговорност за грешките во учебниците

Во Штип пак, на првиот ден од второто полугодие, поразителна и загрижувачка информација.

Осумдесет и еден ученик од штипските основни и средни училишта се испишани поради нивно заминување во странство. Раководителот на Секторот за образование во Општина Штип, Снежана Санева, истакна дека оваа бројка на испишани ученици е од септември до декември 2022 година, односно за време на првото полугодие од учебната 2022/2023 година.

Од оваа бројка, во средните училишта се испишани 12 ученици, а од основните 69, објави новинската агенција МИА.