Започнуваат уписите на УГД со првиот уписен рок од 20 до 23 август, слободни  места за близу 4000 нови студенти.

Во вторник (20.08.2024) започнува првиот уписен рок за упис на студенти во прва година на факултетите и академиите на Универзитетот „Гоце Делчев“ – Штип.

Заинтересираните кандидати и досега  можеа електронски да аплицираат преку порталот на делот за уписи на веб страната на УГД. Има близу 4000 слободни места за Прв циклус на студии.

-Конкурсот опфаќа околу 70 студиски програми на 12 факултети и три уметнички академии. Вкупно има слободни 3983 места. Сите и нформации за студиските програми се објавени на веб страната на УГД во делот за уписите, а заинтересираните и досега можеа да аплицираат онлајн, на порталот на веб страната, со неколку клика да направат свој профил и да ги внесат своите податоци. Но тоа е само првата фаза од аплицирањето, ќе треба и да се достават оригиналните документи, за да може да се рангираат.    Првиот уписен рок е од 20 до 23 август, вториот на 5 и 6 септември, а третиот 18 и 19 септември. Академската 2024/25 ќе започне на 1 октомври – изјави проректорот за настава, проф. Д-р Мишко Џидров.

УГД ќе ги ослободува од партиципација најдобрите кандидати за студенти

И годинава, Универзитетот има голем број на ослободување од партиципација – најдобро рангираните кандидати на сите факултети (точната бројка на кандидати е објавена во Конкурсот) ќе бидат ослободени од партиципација во првата година од студирањето.

Филолошкиот факултет останува со посебна програма за поддршка на новозапишаните студенти, на Македонски јазик и книжевност се ослободуваат од партиципација во сите четири години од студирањето сите кандидати кои ќе се запишат во трите уписни рока. На Германски, Тирски и Италијански јазик и книжевност има по десет ослободувања од партиципација, а на Англиски 20 ослободувања.