Планинарството е една од најздравите физички активности кои се изведуваат во природа. Планинарството ни обезбедува здрав дух, здраво тело и прекрасни дестинации. Никогаш не е доцна за да се започне со планинарење.

Александар Величков, кој веќе една година активно искачува планини, ни открива како и зошто почнал да планинари.

Александар Величков

“Љубовта кон татковината, кон природата и нејзините убавини се нешто кое се доживува и со зборови не се опишува. Македонија е богата со вакви реткости, кои во слободно време ги посетував и истражував. По природа сум авантурист, па сакам да откривам нови и непознати места, па токму така и започнав со планинарењето. На почетокот одев сам и со пријатели, но подоцна се приклучив во ДПС Лисец од Штип, па би ја искористил оваа прилика да ги поздравам и да им искажам посебна благодарност за трудот, посветеноста и прекрасните акции кои тие ги нудат“.

Кога се оди во планина има одредени правила кои треба да се почитуваат. Сепак ова е спорт кој бара исклучителна посветеност.

“Правила има и истите мора да се почитуваат, бидејќи ние луѓето сме дел од природата, а не таа од нас. Затоа најважно е да ја почитуваме истата, да ја разбереме секоја ситуација во која се наоѓаме и да имаме трпение за нештата околу нас. Мора да се чуваат планините, да се биде позитивен и многу мотивиран. Сето останато се учи и стекнува со време”.

Покрај авантурите и преубавите погледи тука е и чувството кога ќе се достигне посакуваната цел.

“Чувството не може да се опише на тој начин, како што може да се доживее. Ниту еден момент не испарува од вашите сеќавање, ниту еден поглед не се заборава. После толку потрошена енергија и поминати километри, вложен труд и голема желба, на крајот се гордееш со самиот себе што си ја исполнил целта и нема ништо поубаво од тоа. Кој пробал знае, а кој не, кога ќе проба повторно ќе засака.”

Во однос на дестинациите Величков верува дека секоја дестинација е посебна на свој начин.

“Најдобра дестинација нема, бидејќи секој ужива во она што го исполнува. Македонија навистина ни нуди за секого по нешто. Сето она кое е дар од природата е вредно да се посети. Лично, сакам водопади и истите ми се предизвик кога се скриени длабоко во некоја шума или високо во планината, па  треба поголема енергија и напор за да се посетат, но кога се застанува пред нив верувајте, дупло ќе си надоместите”.

Овој прекрасен спорт нуди многу уживања, дружби, здравје па се надеваме дека и вие ќе бидете инспирирани од приказната на Александар за да почнете да планинарите.