Гевгелија викендов трета година по ред ќе биде домаќин на уличната трка насловена November run Gevgelija 2023. На овој настан учество имаат пријавено вкупно  2350 пријавени учесници во сите категории-детска трка, улична трка на 5 км и 10 км,  и  инклузивна трка на 1 километар. Големиот број на пријавени учесници, од дома и од странство (од 16 држави) придонесоа  овој настан да прерасне во најмасовен настан во Гевгелија, во нашата држава но и пошироко во регионот.

Автор на текстот: Надја Шопова

Фото: Мартин Стојанов

Уличната трка е во организација на Атлетски клуб “7ми Ноември”Гевгелија и истата е организирана според правилата на IAAF и Атлетската федерација на Македонија во согласност важечките законски прописи.

Оваа година, за прв пат учесниците ќе се трчаат на сертифицирана патека бидејќи по извршените мерења за патеките од 5 и 10 километри добиен е   меѓународно признат сертификат според AIMS стандардите со што остварени резултати на сите учесници- домашни и странски ќе бидат меѓународно вреднувани и признаени.

Натпреварувањата ќе започнат во сабота на 04.11.2023г. кога треба да се одржат два настана- детската трка за која се пријавени повеќе од 600 деца кои ќе се натпреваруваат во три категориии и инклузивната трка на 1 километар “RUN TOGETHER” која се организира за прв пат и претставува прва трка во Македонија организирана за лица со попреченост. Оваа трка е организирана во соработка со Фондацијата” Ице Бегов”.

Во недела на 05.11.2023 година, ќе се одржат трките на 5 и 10 километри. Победникот на трката од 10 километри ќе биде прогласен за државен шампион од страна на Атлетската Федерација на Македонија.