Државна матура годинава ќе се полага на 4 и 13 јуни. На 4 јуни се полага првиот екстерен испит – Мајчин јазик, а на 13 јуни вториот екстерен испит.

За учебната 2021/22 година се пријавени вкупно 15 899 кандидати за полагање на државната матура. Од нив, 7135 се од гимназиско образование, 8504 од стручно и 260 од уметничките училишта.

Првиот екстерен испит – Мајчин јазик и литература ќе се полага в сабота, 4 јуни. Според податоците на Државниот испитен центар, за македонски јазик се пријавени 11 060, за албански јазик 4308 и за турски јазик 313 матуранти.

Полагањето на вториот екстерен испит е закажано за 13 јуни. Најмногу пријави има за англиски јазик – 14 320 кандидати, за математика се пријавиле 1231, за германски јазик 118, триесет кандидати има за тестот по француски јазик, 10 за руски јазик, 15 ќе полагаат филозофија и 100 кандидати се пријавени за естетика.

Резултатите од Државна матура ќе бидат објавени 30 дена од полагањето на вториот екстерен испит

Резултатите од испитите треба да бидат објавени најдоцна 30 дена од полагањето на вториот екстерен испит. Покрај екстерни, матурантите имаат и два интерни испита и една проектна задача.

Учениците кои завршуваат средно образование и оваа година ќе полагаат државна матура како и минатогодишната генерација, која се избори за два наместо три екстерни предмети и за скратени испитни програми.

Од догодина државна матура во спортски сали и амфитеатри

Државната матура во земјава се спроведува од 2007 година. На крајот на 2019/2020 првпат не беше организирана поради КОВИД-19, а на барањето на минатогодишните матуранти да им бидат олеснети условите, бројот на екстерни испити беше намален од три на два односно третиот екстерен беше спуштен на ранг на интерен испит. И годинава имаше слични барања, дури се покрена и петиција за да не се полага државна матура, тоа барање не беше прифатено. на целата ситуација околу полагањето на државната матура влијаеше и штрајкот на СОНК. Се стѕравуваше дека полагањето нема да може да се реализира, но и овде Државниот испитен центар уверуваше дека штрајкот нема да влијае на овој процес.