Развојот на вештачката интелигенција (AI) веќе не е прашање на иднината, туку на сегашноста. Според најновите анализи на International Labour Organization дури една од четири работни позиции глобално ќе биде значително трансформирана од генеративната AI.

Дополнително, истражување на Goldman Sachs покажува дека околу 300 милиони работни места ширум светот се изложени на автоматизација, што претставува една од најголемите трансформации на трудот во модерната историја.

Најголем ризик постои кај административните и канцелариските професии, бидејќи се базираат на повторливи задачи. Анализа објавена од Investopedia  покажува дека токму овие работни места се најподложни на автоматизација.

Интересно е што под притисок се и дел од технолошките професии. Според дополнителен извештај на Goldman Sachs AI веќе влијае врз програмерите и аналитичарите, особено на почетничко ниво, преку автоматизација на задачи како пишување код.

Во креативниот сектор, новинарството, маркетингот и дизајнот исто така се менуваат. Според глобалната анализа на International Labour Organization AI повеќе ќе ги надополнува луѓето отколку целосно да ги замени.

Клучниот заклучок од повеќето истражувања е јасен: не исчезнуваат професии, туку задачи. Истото го потврдува и извештај на International Labour Organization според кој главниот ефект ќе биде трансформација на работата, а не масовна невработеност.

Некои студии одат чекор понатаму и укажуваат дека, иако до 85 милиони работни места може да исчезнат, паралелно може да се создадат дури 97 милиони нови професии .

Од сето ова, можеме да дојдеме до заклучок дека иднината на работата нема да биде без луѓе, туку ќе биде поинаква. Наместо рутински задачи, ќе се вреднуваат креативноста, критичкото размислување и способноста за работа со технологија.