Хрватска е прва од екс ју државите која ќе го укине единствениот матичен број на граѓанинот (ЕМБГ), воведен во некогашна Југославија во 1976.

Хрватското Министерство за внатрешни работи го стави на јавна расправа Предлог-законот за престанок на важење на матичниот број. Доколку законот биде усвоен, Хрватска ќе биде првата земја во поранешна Југославија која ќе престане да го користи единствениот матичен број.

Предложениот закон содржи само два члена – одредби за укинување на Законот за матичен број и за моментот на влегување во сила на законот, пренесува порталот Индекс.

Во 2009 година, Хрватска воведе личен идентификациски број (ОИБ) кој ќе се користи наместо единствениот матичен број (ЈМБГ), а во периодот на транзиција на граѓаните им се доделуваа двата броја.

Хрватска уште во 2009 воведе личен идентификациски број

Матичните броеви на граѓаните утврдени до денот на истекот на Законот за матичен број нема да се бришат од постојната евиденција и ќе можат да се користат за поврзување и размена на податоци во оние случаи кога поврзувањето податоци не може да се врши со користење на ОИБ.

Законот за единствениот матичен број на граѓани беше воведен во цела поранешна Југославија во 1976 година, а потоа законот го донесоа сите републики.

Бројот се состои од 13 цифри, од кои првите седум го претставуваат датумот на раѓање, а следните две го означуваат регионот на раѓање. Претпоследните три цифри се единствен број, а на крајот има контролна цифра.

Од есен електронско запишување и во средно училиште

Доколку законот биде усвоен, Хрватска ќе биде првата држава од поранешна Југославија која официјално ќе го укине ЕМБГ, иако во пракса, според Индексот, ОИБ се користи речиси исклучиво, освен за координација на податоците меѓу различни државни регистри.

При воведувањето на ОИБ, хрватските власти како предност на новиот број го посочија тоа што не ги открива личните податоци на граѓаните, но и што овозможува подобар преглед на имотот на граѓаните и правните лица. Бројот е доделен од хрватското Министерство за финансии.